Auawa na kutupwa mtoni

MKAZI wa  kijiji  cha Sakalilo, Laela mkoani  Rukwa, Calistus Jacob (44), ameuawa kwa  kukatwa  na vitu vyenye ncha  kali kichwani na kisogoni  kisha  kutupwa  chini ya daraja la Mto Mumba na watu wasiojulikana.

Kabla ya tukio hilo, taarifa zinaeleza kwamba Jacob alionekana akiwa kilabuni na wake zake wawili wakinywa pombe na aliwaaga na kuondoka, lakini hakurudi tena hadi alipokutwa akiwa amefariki dunia.

Kamanda wa Polisi Mkoa wa Rukwa, Geoge Kyando, alisema juzi kuwa chanzo cha mauaji hayo hakijajulikana na juhudi za Jeshi la Polisi zinaendelea ili kubaini.

Alisema baada ya kupata taarifa hizo, alifika eneo la tukio na kujionea uhalisia wa jambo hilo na baadaye waliubeba mwili huo hadi hospitalini na kufanyiwa uchunguzi, hivyo kubainika kuwa aliuawa kwa kupigwa na kitu chenye ncha kali kichwani na kisogoni, kisha kutupwa mtoni.

Alisema mwili wa marehemu umekabidhiwa kwa ndugu zake kwa ajili ya mazishi baada ya kufanyiwa uchunguzi wa kitabibu na kugundua kuwa alichomwa na kitu chenye ncha kali na kutupwa mtoni.

Kyando alisema hadi sasa hakuna mtu aliyekamatwa kutokana na tukio hilo na kwamba uchunguzi wa kipolisi unaendelea.

Aidha, Kamanda Kyando alisema atalifuatilia suala hilo na  kuhakikisha  anawakamata   na  kuwafikisha  mahali  husika  wahusika   wa   tukio hilo na kuwataka wananchi kuacha kujichukulia sheria mkononi.