Mbeya City yatamba kuwasambaratisha wajelajela

Wachezaji wa Mbeya City mazoezini

 Kikosi cha Mbeya City FC kinajufua kujiandaa na mchezo wa ligi kuu ya Soka Tanzania Bara dhidi ya Tanzania Prisons unaopigwa kesho Jumamosi katika Uwanja wa Sokoine jijini Mbeya.

Kocha  Msaidizi wa kikosi hicho Mohamed Kijuso amesema maandalizi kuelekea mchezo  huo yanaenda vizuri na wachezaji wote wako kwenye hali nzuri na kinachofanyika kwa sasa ni kurekebisha makosa  yaliyojitokeza kwenye mchezo wa kombe la FA licha ya kupatikana kwa ushindi wa bao 2-0.

"Tunashukuru Mungu  kwa sababu tulipata matokeo kwenye mchezo wa kombe la FA licha ya mchezo kuwa mgumu, tuko mazoezini hivi sasa kurekebisha makosa yote yaliyotokea," amesema Kijuso.

Kijuso ameongeza kuwa kwa mujibu wa daktari, wachezaji wote wapo fiti kuelekea mchezo huo.
"Ninaiheshimu Tanzania Prison ni timu nzuri  huwezi kuibeza kwa namna yoyote,  ni wazi mchezo wa Jumamosi utakuwa mgumu," amesema Kijuso.

Kijuso ameongeza kuwa mipango na malengo ya kikosi chake ni kuhakikisha wanakuwa sehemu ya timu nne za juu kwenye msimamo wa ligi  mara ifikapo mwisho wa msimu.